.png)
Ourense, un pequeno centro urbano e unha gran perifieria en declive
Ante o marco actual, no
que as axudas ao medio rural e as actividades que no mesmo se
desenvolven, resultan de vital importancia para a súa supervivencia,
resulta transcendental coñecer a realidade das zonas as que se
destinan estas axudas. Non só resulta axeitado coñecer cales son os
territorio máis desfavorecidos, senón que é moi necesario coñecer
cales son os seus sectores produtivos, a súa estrutura social e unha
serie de variables que os caractericen para realizar un reparto que
optimice estas axudas.
O obxectivo do traballo
é realizar unha clasificación dos diferentes concellos de Ourense
en función das súas características demográficas e económicas,
para a continuación realizar unha caracterización dos diferentes
grupos. Ademais, creouse unha aplicación SIX de xeito que se obtén
un mapa cos diferentes concellos e a súa clasificación, así como
os datos empregados para chegar á mesma.
A metodoloxía parte da
obtención de diferentes datos estatísticos dos 92 concellos da
provincia, a partir de fontes como o Instituto
Nacional de Estadística,
o Instituto
Galego de Estatística
e o anuario económico de España 2012, elaborado por La
Caixa.
Estas 24 variables estudadas, foron distribuídas en dous grandes
grupos, co gallo de obter un índice económico e un índice
demográfico para cada concello.
Para obter estes dous
índices, realizouse unha estandarización de tódalas variables.
Isto fíxose dándolle puntuando cun 0 a aquel valor máis
representativo para un concello de carácter rural, e cun 1 ao que
representa a un concellos de características urbanas. Tendo en conta
que, para definir as diferenzas entre as áreas urbanas e rurais, as
variables teñen unha importancia diferente, aplicáronselle certos
coeficientes de ponderación. A suma de todos os valores de cada unha
das variables (multiplicados polo seu coeficiente de ponderación)
para cada un dos concellos, dá como resultado o valor destes
índices.
Os valores obtidos foron
representados nunha gráfica de dispersión, onde cada punto
representa un concello diferente. Deste xeito, aqueles puntos que se
atopan próximos dentro desta gráfica, representan concellos cunhas
características semellantes.
O resultado obtido foi
unha clasificación dos concellos en tres diferentes tipoloxías:
concellos de marcado carácter rural, concellos de carácter
intermedio e concellos de carácter urbano. A grande cantidade de
concellos de marcado carácter rural (78 dos 92 concellos da
provincia), fixo que estes fosen divididos en cinco subtipo, co
propósito de analizar polo miúdo os diferentes concellos. Dentro
dos concellos de carácter urbano, os concellos de Ourense e Barbadás
destacan notablemente sobre os demais, polo que esta tipoloxía tamén
foi dividida en dous subtipos, sendo no subtipo B no que encadraron
estes dous concellos.
A principal conclusión
que se extrae do traballo é o marcado carácter rural da provincia
de Ourense, onde a perda demográfica e a escasa diversificación
económica son unha constante. Ademais compróbase que, algunhas
capitais comarcais, non gozan da importancia a nivel local que
deberían, polo que unha iniciativa en prol de recuperar esta
importancia, conseguiría crear unha provincia con múltiples
centros, freando o centralismo que a caracteriza.
Javier Feijoo Cortizo
0 comentarios: